Logo

Dialäkt

Mathias Born am Dienstag den 26. November 2013

Heitere Fahne! Itz bisch du scho zähni?  Das schribt dr Webflanör i sire Gratulation a di Alemannische Wikipedia. Äs Lexikon, wo nume us Dialäkttägschte besteit, isch ä glungnigi Idee.  Glunge im Sinn vo guet: Wüu dert bylöifig abegschribe wird, wi me redt – nid pinlech gnau für d Wüsseschaft, aber o nid häreklepft wi bim Tschätte. Glunge aber o im Sinn vo skurril: Wär büglet scho mit em ne Dialäktlexikon, we Hochdütsch eifacher z läse isch? U we me d Häufti eh chum versteit: Ir Alemannischi Wikipedia herrscht es Tohuwabohu vo Dialäkte us dr Dütschschwiz, em Elsass, us Liechtestei, Oberbade, em Schwabeland, em Voralbärg und sogar vo de Walser us Italie – auso us aune Gebiet, wo me lut Linguischte Alemannisch redt.

Dr Webflanör büglet nie mit der Alemannische Wikipedia. Är schnöigget aber gärn drin, sit ihn ä Fründ ufmerksam gmacht hett uf si Erguss zum Thema Kuss – uf Bärndütsch: zum Müntschi. Am Webflanör sini Lieblingssteu: «Es gschtounigs Müntschi isch eis, wome ufdrückt oder abhout, ohni dases di angeri Person wott. Je nach Situation chan en aagmässni Reaktion e Wasche oder es Müntschi zrugg sy.»

Richtig luschtig wirds aber, we me nid im stiue Chämmerli schnöigget, sondern sech gägesitig bim ne Glesli Wy Artiku i frömde Dialäkt vorlist:  eine uf Elsässisch, eine uf Seisler-, eine uf Walliserdütsch.

Itz isch di Alemannischi Wikipedia auso zähni worde. Zuegäh: Für das Auter isch si no veiechli chly.  Nume grad zwo Häng vou Lüt schribe regumässig. Derfür gits etlechi, wo öppedie öppis biistüre. Immerhin si so scho 15000 Artikel zämecho. Dr Webflanör  wünscht dr Alemannische Wikipedia jedefaus aues Guete zum Geburi. Und är seit Merci: Für die ungerhautsame Stunge bim Vorläse im Fründeskreis. Und dass sie ihm ä Vorwand gliferet hett, ändlech mau so z schribe, wi ihm dr Schnabu gwachse isch.

« Zur Übersicht

Ein Kommentar zu “Dialäkt”

  1. Holder sagt:

    Dankschen fir dää inträssant Bydraag. Fir is as Autore vu dr Alemannische Wikipedia isch s schen, au mol vun eme Lääser eso ne Ruggmäldig z iberchuu.